ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានចូលរួមរំលែកទុក្ខទៅដល់ប្រធានាធិបតីនៃប្រទេសកូរ៉េខាងត្បូងលោក យូរ ស៊កយ៉ល (Yoon Suk Yeol) ចំពោះមរណភាពឪពុកលោក។

ក្នុងសាររំលែកទុក្ខនៅថ្ងៃទី១៥ ខែសីហា ឆ្នាំ២០២៣នេះ សម្តេចតេជោ ហ៊ុន សែន បានលើកឡើងថា សម្ដេចនិងសម្ដេចកិត្តិព្រឹទ្ធបណ្ឌិតមានអារម្មណ៍សោកសៅក្រៃលែង នៅពេលទទួលបានព័ត៌មានអំពីមរណភាពលោក យូន គីជុង នៅថ្ងៃទី១៥ ខែសីហា ឆ្នាំ២០២៣។

សម្ដេចតេជោលើកឡើងថា៖ «ក្នុងគ្រាដ៏សោកសៅនេះ ខ្ញុំនិងភរិយាសូមរំលែកទុក្ខដ៏ក្រៀមក្រំនេះ រួមនិងសមានចិត្តដ៏ជ្រាលជ្រៅជាមួយឯកឧត្តម និងក្រុមគ្រួសារ ចំពោះការបាត់បង់ដ៏ធំធេងនេះ»។

សម្តេចជឿជាក់ថា ឪពុកជាទីគោរពស្រលាញ់របស់ប្រធានាធិបតីកូរ៉េ បានចាកចេញជាមួយនឹងបេះដូងពោរពេញដោយសេចក្តីស្ងប់ មោទកភាព និងការពេញចិត្ត ដែលគាត់បានចិញ្ចឹមបីបាច់កូន ឱ្យក្លាយជារដ្ឋបុរសដ៏ឈ្លាសវៃ ដែលខិតខំប្រឹងប្រែងមិនខ្លាចនឿយហត់ ចំពោះការលើកកម្ពស់សេចក្តីសុខ វិបុលភាព និងសុខុមាលភាព នៃប្រជាជាតិកូរ៉េទាំងមូល។

យោងតាមការផ្សាយរបស់សារព័ត៌មាន Reuter ឪពុករបស់ប្រធានាធិបតីកូរ៉េខាងត្បូង Yoon Suk Yeol ដែលជាសេដ្ឋវិទូដ៏ល្បីល្បាញ Yoon Ki Jung បានទទួលមរណភាពក្នុងអាយុ ៩២ឆ្នាំ នៅថ្ងៃអង្គារនេះ បន្ទាប់ពីបានសម្រាកព្យាបាលជម្ងឺនៅមន្ទីរពេទ្យ និងបានទទួលមរណភាពបន្ទាប់ពីលោកប្រធានាធិបតីបានថ្លែងសុន្ទរកថាដែលប្រារព្ធខួបនៃការរំដោះប្រទេសកូរ៉េពីការគ្រប់គ្រងអាណានិគមរបស់ប្រទេសជប៉ុនឆ្នាំ១៩១០-១៩៤៥៕